Schlagwort: Liab

So viel Liab han ih ah!

Wos da Hapfnschloga-Natzl

So viel Liab han ih ah!

Wos da Hapfnschloga-Natzl
Von sein Diandl mocht a Gschroa;
Ärga kunnt er neama klempern,
Wann s von Guld und Silba woa!

Jo, ih wüßad ah a Diandl,
Dos nit schlechter is' wia seins;
Grod so tausndliab, wia seins is',
Grod so tausndliab is' meins!

Glaubts, weil ih nit hapfnklempern
Und nit stieglhupfn konn,
Glaubts mar eppa, daß ih deßwegn
Ah ka Liab in Herzn hon?

So viel Liab han ih fürs Diandl,
Daß s mas ös scho long nit nehmts;
So viel Liab, daß ih eng prügl,
Wann s mar üba d' Miazerl kemts!

Peter Rosegger

Gedicht auf obersteirischer Mundart

Peter Rosegger (1843 – 1918), österreichischer Volkschriftsteller, Dichter. Pseudonym: P. K. Petri Kettenfeier

aus: „Tither und Hackbrett – Zither und Hackbrett – Gedichte in obersteirischer Mundart“ von Peter Rosegger. Verlag: Lenkam, Graz, 1895. Seite 28

Wos d’Liab oll’s is

Möcht in Herzerle sein

Wos d'Liab oll's is

D' Liab is a Rauba,
Möcht in Herzerle sein;
Und won ma nit aufmocht,
So brichts oan holt ein.

D'Liab is a Vögerl,
In Mai fliagts daher;
Thuas songa, schau, späta,
Do kimts neamamehr.

Und 's Vögerl is hoamisch,
Mei Herz is sei Haus;
Hiazt, won ih ah aufmoch,
Fliagts neamamehr aus.

A hellklingends Glöckl
In Herzn is d'Liab;
Gib ocht, daß 's koan Sprung kriagt,
Sist keits nocha trüab!

D'Liab is a Wasserl,
Rint unta die Bruck,
Und mei Herz is a Schifferl,
Kimt neamamehr zruck.

D'Liab is a Flamerl,
S'entzündt sich so gern,
Und wons d' damit spielst,
Konst an Obrandla wern.

D'Liab is a Bleamerl, 
Recht guat muaßt es pflegn;
Schau, d'Liab braucht a Busserl,
Wia 's Bleamerl an Regn.

Peter Rosegger

Gedicht auf obersteirischer Mundart

Peter Rosegger (1843 – 1918), österreichischer Volkschriftsteller, Dichter. Pseudonym: P. K. Petri Kettenfeier

aus: „Zither und Hackbrett – Gedichte in obersteirischer Mundart“ von Peter Rosegger. Verlag: Lenkam, Graz, 1895. Seite 7